கரூர்: புதிய ரேஷன் கார்டு வேண்டுபவர்கள் மற்றும் ரேஷன் கார்டு குறித்த குறைபாடுகளை நிவர்த்தி செய்ய விரும்புவோருக்காக கரூர் மாவட்ட நிர்வாகம் குறைதீர் முகாம் ஒன்றை நாளை நடத்துகிறது.
இது குறித்து கரூர் மாவட்ட கலெக்டர் ஜெயந்தி வெளியிட்டுள்ள செய்திக்குறிப்பில் கூறியிருப்பதாவது,
கரூர் மாவட்டத்தில் உள்ள ஐந்து தாலுகாக்களில் நாளை ரேஷன் கார்டு தொடர்பான குறைதீர் முகாம் நடைபெற உள்ளது.
கரூர் மாவட்டத்தில் ரேஷன் கார்டுகளில் பெயர் சேர்த்தல், பெயர் நீக்கல், பெயர் திருத்தம், புதிய ரேஷன் கார்டு கோருதல், உணவு பொருள் வழங்கல் தொடர்பான பொது மக்களின் குறைகளை களைவதற்கு குறைதீர் கூட்டம் நாளை தாலுகா வாரியாக நடைபெற உள்ளது.
கரூர் தாலுகாவில் வேட்டமங்கலம் பஞ்சாயத்து அலுவலகம், அரவக்குறிச்சி தாலுகாவில் நாகம்பள்ளி, குளித்தலை தாலுகாவில் வைகைநல்லூர் தெற்கு வை.புதூர் கிராம நிர்வாக அலுவலகம், கிருஷ்ணராயபுரம் தாலுகாவில் பஞ்சப்பட்டி பஞ்சாயத்து அலுவலகம், கடவூர் தாலுகாவில் பாப்பையம்பாடி பஞ்சாயத்து அலுவலகம் ஆகிய இடங்களில் காலை 10 மணி முதல் 1 மணி வரை முகாம் நடைபெறுகின்றது. எனவே, இந்த அரிய வாய்ப்பினை பொது மக்கள் பயன்படுத்தி நலம் பெற வேண்டுகின்றேன் என தெரிவித்துள்ளார்.
