விஜயகாந்த்தை திருப்திபடுத்தவே அழகிரி நீக்கம்: அ.தி.மு.க எம்.எல்.ஏ பேச்சு

சென்னை: தேமுதிக தலைவர் விஜயகாந்த்தை திருப்திபடுத்துவதற்காகவே திமுகவில் இருந்து அழகிரி நீக்கப்பட்டதாக அதிமுகவினர் கூறியுள்ளனர்.

திருச்சியில் நேற்று நடைபெற்ற அதிமுக பிரசார கூட்டத்தில் பேசிய அரசு தலைமை கொறடாவும், அதிமுக திருச்சி மாநகர் மாவட்ட செயலாளருமான ஆர்.மனோகரன் எம்.எல்.ஏ, அழகிரியின் தற்காலிக நீக்கம் இன்று முக்கிய செய்தியாக இருக்கிறது. இதில் தமிழ்நாட்டு மக்கள் ஆச்சரியப்படுவதற்கு ஒன்றுமில்லை.

2011 சட்டசபை தேர்தலில் தமிழகம் முழுவதும் தினந்தோறும் விஜயகாந்தை திட்டுவதற்காக நடிகர் வடிவேலுவை தி.மு.க. சார்பில் அனுப்பி வைத்தவர் இந்த அழகிரிதான் என்பது எல்லோருக்கும் தெரியும். இந்நிலையில் நாடாளுமன்ற தேர்தல் கூட்டணிக்காக, கருணாநிதி, இஸ்லாமிய பிரதிநிதிகளை அனுப்பி பார்த்தார். பாதிரியார்களை அனுப்பினார். ஆனால் விஜயகாந்த் மசியவில்லை.

இப்போது வழியில்லாமல் விஜயகாந்தை திருப்திபடுத்தவே அழகிரியை கருணாநிதி நீக்கியுள்ளார். இது நாடகம் என்பதை நாட்டுமக்கள் உணர்வார்கள் என்றார்.